परम शक्ति को सामु निर्बलको उजुरी
मनुप्रवाह एक्कासि
बग्दा बग्दै थकित भयो ।
सुन्सान गल्ली सडक हेरी
जीवनधारा चकित भयो ।।
अग्लो भवन सुरक्षित छ
धनको कवच ग्रहण गरी ।
झुपडी मुर्छित परेको छ
खाँचो अरथी वहन गरी ।।
दिन्हुँ ज्यामी कसो गर्छ
पेटको आगो निभाउन ।
उचित के हुन्छ दिनचर्या
घर परिवार बचाउन ।।
पसले चिन्तन मनन् गर्छ
हानि नाफा किताबमा ।
कृषक अचम्म देखिन्छ
बाली जोग्ने हिसाबमा ।।
गाली मुक्का दरो लाठी
खाँदै गर्छ बुभुक्षित ।
बलको निर्मम नौटङ्की
निमुखा माथि लक्षित ।।
पीडा बेहोर्दछन् कसरी
गरिब असहायले ।
दुइ छाक टार्न सक्दैनन्
मजदुर समुदायले ।।
बिरामी त निको हुन्छन्
उपचार औषधी भए ।
भोकले ज्यान हारिन्छन्
प्रकोपमा नमारिए ।।
आदेश पालना गर्न
हुनु पर्छ विवेकमा ।
हाम्रै दायित्व देखिन्छ
भोको नहोस् छिमेकमा ।।
सुहैल अन्सारी
भोक्राहा-2 सुनसरी
No comments:
Post a Comment